ءسوز باسىندا دەپۋتات حانىم ەلباسىنىڭ تاريحي شەشىمىنە نازار اۋدارىپ, بۇل ماسەلەنىڭ دە اتا زاڭعا ەش قايشى كەلمەيتىنىن جەتكىزدى.
«ەلباسىنىڭ وسىنداي شەشىم قابىلداۋى كونستيتۋتسياعا سايكەس كەلەدى. سەبەبى, وعان دەيىن ەلباسىنىڭ كونستيتۋتسيالىق كەڭەس ارقىلى بۇل ماسەلەنى جان-جاقتى تالقىلاپ, پىسىقتاپ العانىن ءبارىمىز جاقسى بىلەمىز. بۇل تۇڭعىش پرەزيدەنتىمىزدىڭ اتا زاڭدى قۇرمەتتەپ, وعان باعىناتىنىن كورسەتەدى. وسىعان بايلانىستى 20 ناۋرىزدا سەنات پەن ءماجىلىستىڭ بىرلەسكەن وتىرىسىندا قازاقستان رەسپۋبليكاسىنىڭ پرەزيدەنتى وكىلەتتىگىن سول كەزدەگى پارلامەنت سەناتىنىڭ توراعاسى قاسىم-جومارت كەمەل ۇلى توقاەۆقا بەرۋى تۋرالى ماسەلەنى تالقىلادىق», دەدى انار جايىلعانوۆا.
سونداي-اق ءماجىلىس دەپۋتاتى اتالعان وتىرىستا تاعى ءبىر ماڭىزدى ماسەلە قارالعانىن ايتتى.
«سول كۇنى استانا قالاسىنىڭ اتىن وزگەرتۋ ماسەلەسى دە قارالدى. بۇل ماسەلەنى سەنات پەن ءماجىلىس دەپۋتاتتارى ءبىراۋىزدان قولداپ داۋىس بەردى. سەبەبى, ەلباسىنىڭ استانانى سالۋعا سىڭىرگەن ەڭبەگى وراسان زور. قالاداعى ءار عيماراتتا ەلباسىنىڭ قولتاڭباسى بار. وسىنداي اسەم شاھاردىڭ سالىنۋىن تۇڭعىش پرەزيدەنتىمىز تىكەلەي قاداعالاپ, بۇكىل كۇش-جىگەرىن سوعان جۇمسادى. ونى ەشكىم جوققا شىعارا المايدى. ءتىپتى جاستارىمىزدىڭ وسىنداي الەمدىك دەڭگەيدەگى قالادا تۇرىپ جاتقانىن شەتەلدىكتەردىڭ الدىندا دا ۇلكەن ماقتانىش تۇتاتىنىنا ءوز باسىم كامىل سەنەمىن», دەدى انار جايىلعانوۆا.
وسى ماسەلەگە قاتىستى قوعامدا ءتۇرلى پىكىرلەر ايتىلىپ جاتقانىنا نازار اۋدارعان دەپۋتات ونىڭ كونستيتۋتسياعا ساي ەكەنىن ەرەكشە اتاپ ءوتتى.
«قازىر بۇل ماسەلەنىڭ كونستيتۋتسياعا قانشالىقتى ساي ەكەنى تۋرالى كوپتەگەن پىكىرلەر ايتىلىپ جاتىر. ول تۋرالى كەزىندە كونستيتۋتسيالىق كەڭەستىڭ مۇشەسى بولعان ادام رەتىندە ايتار بولسام, اتالعان باستاما تولىعىمەن زاڭ شەڭبەرىندە شەشىلىپ وتىر. ويتكەنى اتالعان جايتقا قاتىستى زاڭ جوباسىن پارلامەنتكە پرەزيدەنتتىڭ ءوزى ەمەس ۇكىمەت ەنگىزگەن بولاتىن. كونستيتۋتسيانىڭ 61-بابىنا سايكەس ۇكىمەتتىڭ وسىنداي قۇزىرەتى بار. وسى قۇزىرەتتىڭ شەڭبەرىندە ۇكىمەت ول ماسەلەنى جاڭا پرەزيدەنتكە ۇسىندى. ءوز كەزەگىندە جاڭا مەملەكەت باسشىسى بۇل ماسەلە بويىنشا اتا زاڭنىڭ 91-بابىنا سايكەس كونستيتۋتسيالىق كەڭەسكە جۇگىندى. ناتيجەسىندە كونستيتۋتسيالىق كەڭەس وسى ماسەلە جونىندە ونى پارلامەنتكە جىبەرۋگە بولادى دەگەن ارنايى شەشىم دە شىعاردى. سوندىقتان سەنات پەن ءماجىلىس ءوزىنىڭ بىرلەسكەن وتىرىسىندا ماسەلەنىڭ زاڭدىق تۇرعىدا تولىق قامتىلعانىن ەسكەرىپ, زاڭ جوباسىن ەكى وقىلىمدا قابىلدادى. ەندى بۇل زاڭ جوباسى پرەزيدەنت قول قويعاننان كەيىن ءوز كۇشىنە ەنەدى», دەدى ول.
